石库门弄堂里个“近亲结婚”
原创 马尚龙 海上梦叠
作者：马尚龙
沪语改写、朗读：洪瑛
文字修正、指导：丁迪蒙
老早，也就是四十年前头伐，上海石库门弄堂里有人结婚，酒水基本浪就摆勒石库门弄堂里，自家屋里就是新郎新娘搭双方父母加起来个一两桌，其它个桌头，就摆在弄堂里个隔壁邻舍屋里了。
搭邻居关系好勿好，勒办酒水就看出来了。
勿是伊拉欢喜勒石库门里办婚礼，要扎自家台型个上海味道，而是呒没地方办婚礼，借不到天末，只好借地咾。
迭个辰光个上海还是老穷个，呒没改革开放，社会个主人就是穷人，上海滩呒没几家饭店，普通老百姓也是呒没钞票到饭店里去消费个。到了上世纪七十年代，一大批青年侪到了谈婚论嫁个辰光，虽然上级领导部门提倡“移风易俗”，办个革命化个婚礼，但对于老百姓来讲，结婚嘛，总归要有明媒正娶个仪式感。老百姓个结婚仪式感，就是车嫁妆、办喜酒、发喜糖，一方是儿子讨老婆，一方是囡儿嫁出去，侪是顶顶风光个事体。只不过伊个辰光，双方侪勿富裕，饭店也呒没开放办喜酒。
搿个辰光，石库门弄堂办喜酒个两大优势就显现出来了，第一，是石库门邻里之间个热情，欢喜做热心个事体，勿像公寓里个邻居，有文化但矜持，彼此之间有距离感；第二，石库门虽然一户一户分门进出，但是每家人家个一层楼侪是比邻，侪可以派用场。
要是15号张家儿子要结婚了，只要算清爽有几化人来吃喜酒，总归会得有最热心、也是最难搞得定个人毛遂自荐、运筹帷幄。隔壁老王个客堂间可以摆两桌，对面张木匠屋里好摆一桌，圆台面有几只就摆几只，勿够就是方台子配长凳，也好坐个八个人了。搿能一来，酒席真个是要从弄堂口摆到弄堂底了。葛么阿里有介许多个亲亲眷眷啦？弄堂里个隔壁邻舍也要算进去个呀，人家出地方个出地方，借圆台面个借圆台面，单位食堂个师傅来掌勺了，阿里家人家可以勿请啊？
新郎新娘勿像现在搿能个高大上，侪比得上王子、公主个婚礼，也呒没婚庆司仪，更加呒没五点十八分二十八分开席个做法，人坐齐了就开始吃，图个就是闹猛呀。菜是家常菜，有鱼有肉，有足够个量就可以了，真个要是阿里只冷菜味道好，抢光了，主人家会得来添个，比方讲鳗鲞抢光了，再加眼，水笋烧肉吃光了，也好再加点。当然咾，加上来个质量就要差眼了，鳗鲞是尾巴部位，水笋烧肉就是笋、多肉少了。除脱摆勒自家屋里个一两桌，还有敬酒个仪式，弄堂喜酒是吃好算数个。闹新房，搿是要到新房间里再去闹个了。
石库门喜酒最大个亮点是，新郎新娘“亲近结婚”个概率邪气高。
勿是血缘浪向个近，而是邻里浪向个近。3号王家儿子搭18号二层阁刘家囡儿结婚，算近亲结婚伐？石库门侪是知根知底个，人好、人坏侪看勒眼睛里，相互之间亲和随便，甚至隔壁弄堂也是面熟陌生个。少男少女眉来眼去，要么就自家要好了，要么就是弄堂里个红娘来介绍了，一条弄堂或者是隔壁弄堂个，经济条件侪差勿多，爷勒拉厂里做啥，拿多少工钿，也勿是啥个秘密，屋里有几个阿弟阿妹，将来结婚有得亭子间伐，或者后楼可以搭只阁楼伐，介绍个辰光，侪讲得清清爽爽，要想吹牛也吹勿响。人看中了，爷娘也看中了，成功率就老高了。
特别是经过一个热天个乘风凉，夜里勒弄堂里向摆只躺椅，青年男女抬头看星星，低头谈恋爱，总归会得出几对有苗头个了。等到了开年，也就要办喜酒了。
乘风凉乘出男女情，是石库门弄堂个一道风景。顺带便讲一句，有辰光，姘头轧发轧发也就轧出来了。邻居男女，隔壁头个私情，用现在个标准来看，大多数是“勿正当男女关系”， 其实是呒没啥事体个，就是比较讲得拢啦。
近是实在近，12号个黄家阿六头，讨了28号个张家妹妹。老早，嫁妆就是勒弄堂里搬过去个，新娘子也是走过去个。后首来，条件好点了，嫁妆还是直接搬过去，但是新娘子过门，就有点小小排场了。新娘子勿朝婆家走，而是要走到弄堂口，已经有得出租车停勒海了，新郎来接个。上了婚车，到闹猛个地方去兜一圈，又回到弄堂口，新郎、新娘再走进弄堂，算是乘过婚车了。
改革开放前头，上海石库门个婚礼就是搿能个尴尬，可以讲，拨石库门，拨上海人搭仔内地老百姓，慢慢叫带来好日脚个，只有，也唯有改革开放，之前个日脚么？哼哼！
石库门个“亲近结婚”，勒上海属于稳定性最强个婚姻。一，双方个家庭彼此侪熟悉，三观也比较接近；二，即使婚后勿开心想要离婚，整条弄堂里个阿姨妈妈侪会得自告奋勇来个，伊拉是做思想工作个“老娘舅”，因此，离婚简直是比登天还要难呀。
朗读者：洪瑛
原标题：《石库门弄堂里个“近亲结婚”》
阅读原文
新闻推荐
6月6日是第25个全国爱眼日，国家卫健委在5日就我国眼健康工作进展举行发布会，并发布《中国眼健康白皮书》。全国防盲技术指...